ЯҢАЛЫКЛАР

                                                              Илле  ел  кулга – кул тотынып

                                                              Пар былбылдай  тормыш   итәсез.

                                                              Авыр чакта аумас  терәк булып,

                                                              Гомер  йомгакларын  сүтәсез.

                                                              Ә без  сезгә  карап сокланабыз

                                                              Ихтирамлы  сезгә карата.

Гаилә  бәхете  ул – бер-береңә  терәк, таяныч  булып,бер  түбә астында  килешеп озак  яши  алудыр. 50 ел бергә  бер  һаваны  сулап, бер хыяллар  белән  яшәгәннәр икән , димәк  бу – бер-береңне  аңлау, бер-береңнең кадерен белеп  яшәүдер , мөгаен.

Альберт  ага  белән  Әдибә  ханым  педагогика  институтының  спорт залында беренче тапкыр  очрашалар. Озак  та үтми - 1964 елның  29 апрелендә  гаилә  кора  башлыйлар .  Алар гомер буе  яшьлектә  кабызган  гаилә  учагын  саклый белгәннәр. Мәхәббәт   җимеше  булып  дөньяга килгән  ике  кызлары  инде  үз  тормышларын  корганнар.Нәсел  дәвамчылары  булып  оныклар   туган. Шул  рәвешле  шәҗәрә  агачы тармагы  үскән ,киңәйгән.

Тормыш  итүне  өлкәннәр  диңгез  кичүгә  тиңлиләр. Киң  дәрьяда җил-давыллар булмый калмый.  Әмма анда аумас  өчен  гаиләдә  җилкән булырдай  ир канаты , ә инде  аның  янәшәсендә  төпле  акыл  һәм  илаһи  сабырлык   белән  эш  йорткән  олы  йоракле  хатын – Ана булу да  кирәк.

Гаилә  бәйрәмендә  юбилярларга  Казан  мэры  Илсур  Рәис  улы  Метшин  исеменнән  котлау  хаты  һәм  бүләк  тапшырылды.

Бу кичәдә Бөек Ватан сугушы ветераны Василий Филипп улы Коршин белән Лениногорск шәһәренең  10 нчы урта белем бирү мәктәбенең  кадетлары очрашты. Ветераныбыз үз чыгышында үзенең истәлекләре белән, күргән вакыйгалары белән уртаклашты, сугыш елларының ачылыгын сөйләде. Сугыш ветераны Василий Филипп улы Коршин тумышы белән Лениногорск районының Иске Кувак авылыннан. Ул гомер буе туган авылының урта мәктәбендә тарих уктытучысы булып, ә аннан соң мәктәп директоры булып эшли. Аның авыр сугыш еллары 1941 елның декабрь аенда башлана. Ул Крымның: Севастополь һәм Джанкой шәһәрләрен азат итүдә катнаша. Ә инде көтеп алынган Җиңү көнен Латвиядә каршылый. Безнең ветераныбыз 3 нче дәрәҗә “Дан” ордены, “Кызыл йолдыз”, “Ватан сугушының”  1 һәм 2 нче дәрәҗә орденнары белән һәм “Батырлык”, “Хәрби хезмәт өчен” медальләре белән бүләкләнгән.

Укучылар, бигрәк тә егетләр кунагыбызны зур кызыксыну белән тыңладылар. Хәтта, очрашу тәмамлангач та, сораулары калган иде әле. Әлбәттә, кичәдә ишеткән сүзләр аларның күңелендә эзсез калмас дип ышанабыз.

2014 елның 6 май көнендэ ЗАГС һәм администрация хезмәткәрләре Туктабаевлар гаиләсен “зәркән” туйлары белән өйләрендә тәбрик итеп кайттылар. Николай Васильевич Бөек Ватан сугышы ветераны.Ул күп медальләр һәм орденнар иясе. Туктабаевлар гаиләсенә Казан шәһәре мэры исеменнән котлау открыткасы ,акчалата бүләк  һәм администрация исеменнән истәлекле бүләк тапшырылды.

      Бөек җиңү бәйрәме алдыннан Баулы шәһәрендә яшәүче сугыш ветераннары Ахмәтзыя Зәләй улы Камалиев, Госман Имаметдин улы Ханнанов, Рәшит Нургали улы Галәүтдинов 90 яшьлек Юбилейларын билгеләп үттеләр. Ветераннар барсы да намуслы тормыш һәм хезмәт юлы үткәннәр, акыллы балалар тәрбияләгәннәр. Сугыш кырларында күрсәткән батырлыклары өчен  ветераннар күп төрле югары дәрәҗәле орден һәм медальләр белән бүләкләнгәннәр.

      06 май “Казан” Гаилә үзәгендә Бөек Җиңүнен 69 еллыгына багышланган тантаналы бәйрәм узды. Бөек Ватан сугышында җиңү – җир йөзендәге иң көчле һәм җиңелмәс халкыбызның батырлыгы һәм даны ул. Тантаналы бәйрәмдә үзләренең бриллиант һәм алтын юбилейларны билгеләп узучы гаиләләр катнашты. Алар сугыш чоры балалары,сугышның бөтен авырлыгын,анын газап-михнәтен кичергән кешеләр. Алар арасында төрле профессия кешеларе бар иде – гади шофердан алып университет доцентына кадәр. Аларнын барысын – олы мәхәббәт һәм бер-береңә булган хөрмәт берләштерә. Юбилярларга Казан мэры Илсур Рәис улы Метшиннан акчалата бүләк, котлау хаты һәм чәчәкләр тапшырылды.

      Түбән Кама муниципаль районы Гражданлык хәле актларын теркәү идарәсендә агымдагы елның 6 маенда яшь түбән камалыларга паспортлар тапшыру тантанасы булып узды. Патриотизм, туган илгә мәхәббәт, горурлык хисе белән сугарылган әлеге тантана Түбән Кама муниципаль районы ГХАТ идарәсе һәм Татарстан Республикасының Түбән Кама шәһәрендәге Федераль миграцион хезмәте идарәсе белән берлектә оештырылды. Яшүсмерләргә аларның төп документлары булган паспортларын тапшырганда Татарстан Республикасының Түбән Кама шәһәрендәге Федераль миграцион хезмәте идарәсенең беренче бүлеге җитәкчесе Гөлназ Шаһпазова аларны котлап, Рәсәй гражданы булуның мөһимлеген ассызыклады, паспортлар тапшыру тантанасының Бөек Җиңү көне алдыннан үткәрелүе үзе үк символик мәгънәгә ия икәнлегенә аерым басым ясап, егет һәм кызларны яу кырында безнең тынычлыгыбыз өчен баш салган ата-бабаларыбызны хәтеребездән чыгармаска өндәде. 

      2014 елның 06 маенда зур бәйрәм – Җиңү көне якынлашкан көннәрдә музейда тантаналы рәвештә Россияның яшь гражданнарына паспортлар тапшыру церемониясе узды. Бу чараның төп кунаклары булып үзләренең “Бриллиант” туйларын билгеләп үтүче – Хисматовлар һәм Тингляковлар гаиләләре, сугыш ветераны Сагит абый Курамшин, милиция классында белем алучы укучылар булдылар. Район башкарма комитеты җитәкчесенең социаль мәсьәләләр буенча урынбасары Лилия Садретдинова очрашуны ачып юбилярларга район башлыгы исеменнән Рәхмәт хаты һәм истәлекле бүләк тапшырды. ЗАГС бүлеге начальнигы Гөлназ Хәкимова, район ветераннар советы рәисе Николай Дементьев та Җиңү көне белән котладылар һәм тыныч тормыш теләделәр.

      Көннәр җылынды, урамда гына түгел, яшьләр күңеленә дә яз килде. Лаеш шәһәре буенча балалар тууы һәм яшь гаиләләр барлыкка килүе район статистикасында уңай күренеш булып тора. Моның мисалы булып 3 балага туу таныклыгы бирелүе һәм 5 парның гаилә корырга гариза бирүләрен күрергә була.

      Мамадышлылар Владислав һәм Венера гаилә коруда беренче адымнарын ясадылар. Бүген, 6 нчы майда, яшь пар Мамадыш районы ГХАТ бүлегендә язылышу турында гаризага кул куйды. Филипповлар - адаш фамилияле кияү белән кәләш. ГХАТ бүлеге өчен бу бик сирәк күренеш. “Паспорт алмаштырасы булмый, бер мәшәкатькә кимрәк”, - дип сөенечен уртаклашты Венера. “Фамилияләребезнең охшаш булуы – танышкан көнне бер беребезгә игътибарны күбрәк җәлеп итәргә этәргеч булды”, - дип искә ала Владислав. 

     2014 елда Буа районында “Бриллиант” туйларын ундүрт гаилә билгеләп үтә. Бу гаиләләрнең тормыш юллары иһтирамга һәм хөрмәткә лаек. Ә үзләре алар бүгендә бергә булулары белән бәхетле. 06 май көнне  - Бөек Җиңү көне якынлашу алдыннан Буа шәһәрендә яшәүче һәм үзләренең “Бриллиант” туйларын билгеләп үтүче гаиләләрне район башкарма комитеты җитекчесенең социаль мәсәләләр буенча урынбасары Лилия Садретдинова котлады һәм муниципаль район башлыгы исеменнән“Рәхмәт хаты”, бүләкләр тапшырды. ЗАГС бүлеге начальнигы Гөлназ Хәкимова чәчәкләр тапшырып юбилярларга тагын озак еллар яшь буынга үрнәк булып торуларын теләде. Шулай ук үзенең котлауларын ветераннар советы рәисе Николай Дементьев җиткерде. Болай зурлауга иһлас шатланган юбилярлар барлык яшьләргә дә шулай бер-берләрен аңлашып, хөрмәт итеп яшүләрен теләделәр. Ә без исә, үз чиратыбызда, аларның тагын күп еллар исән-сау булуларын телибез.