ЯҢАЛЫКЛАР
21 нче мартта Баулы муниципаль районы башкарма комитеты ГХАТ бүлегендә, Баулы районының УФМС бүлеге хезмәткәрләре белән берлектә, 15 яшүсмергә тантаналы рәвештә паспортлар тапшыру чарасы узды. Районның ветераннар Советы оешмасы вәкиле Галиакберов Анвард Фатых улы һәр баланы җылы котлап паспортларны тапшырды. Бу гомергә бер генә тапкыр килә торган бәхетле вакыйганы яшүсмерләрнең ата-аналары да уртаклашты. Яшьләр бүлеге истәлекле бүләкләр тапшырды.
Март ае төрле бәйрәмнәргә бай. “Бөтен дөнья бәхет көне” уңаеннан Сарман районы Җәлил бистәсе китапханәсендә бәйрәм оештырылды. “Оста куллар” түгәрегенә йөрүчеләр тәҗрибә уртаклашырга җыелдылар. Абзалова Галия апаның кулчатырына, Калимуллина Мөнәвәрә апаның күлмәкләренә, алъяпкычларына сокланмый һич мөмкин түгел. Гатина Фәния апа умарта тоту, Ахмадуллина Нәсимә апа нәсел шәҗәрәсе ясау, Соловьева Фәүзия шигырләр язу белән мавыга. Алар лаеклы ялда булуларына карамастан, хәрәкәттә, эзләнүдә, һәр нәрсәдән ямь табып яшиләр. Без аларга карап сокланабыз.
Нурлатлы Ирек ага һәм Һаҗәр апа Мөхәммәдиевларның һәр иртәсе балаларының, оныкларының хәл-әхвәлен белешүдән башлана.
Балаларының бәхетле тавышларын ишеткән ата-ананың гына түгел, 5 бала, 9 онык һәм 5 оныкчыкның да күңеле була: шөкер, барысы да тигезлектә, исәнлектә. Ирек абый белән Һаҗәр апа тормышларының матурлыгына шөкерана итеп яши. Тигезлектә олыгаюга ни җитә! Балалар, оныклар да туган җирдә, әти-әниләре янында төпләнеп калган. Биш баланың берсе генә дә бәхет эзләп чит шәһәргә чыгып китмәгән. Хәзер әби белән бабай балаларының, онык-ларының уңышларына, матур хәбәрләренә, игелекләренә хәер-фатихаларын биреп яшиләр. Хәлләреннән килгәнчә, балаларын белемле итәргә дә тырышкан алар.
Гаилә башлыгы 40 ел гомерен шофер һөнәренә бирсә, Һаҗәр апаның бар гомере төзелештә уза. Ә бүгенге көннәренә бик рәхмәтле алар. Икесе дә дин юлында, балалары, оныклары янәшәдә, көлеп тора торган уңайлыклы фатирлары булуына шөкерана итәләр. Бу көннәрдә балалар белән бергәләшеп түгәрәк өстәл артына җыелыр өчен дә җай чыгып тора. Март аенда Ирек абый белән Һаҗәр апа үзләренең 85 яшьлек гомер бәйрәмен билгеләп үтсәләр, бергә яшәүләренең 60 еллыгы – бриллиант туйлары да шушы арада икән.
Яз килү бар җирдә дә сизелә. Нәкъ менә бу вакытта һәр эш кешесенең тынчу кабинетын ташлап, табигать кочагына чыгасы килә. Табигатьнең иң матур урынында урнашкан, үзенең саф һавасы белән дан тоткан “Чайка” ял итү базасы Түбән Кама муниципаль районының ГХАТ хезмәткәрләренә ял итү урыны гына түгел, ә ел әйләнәсенә көч җыю урыны булып та хезмәт итте. Анда һәр кеше үзенең күңеленә якын шөгыль тапты: кемдер тимераякта шуды, кемдер чаңгыда ярышты, ә инде кайберләре тюбингларда шууны үз итте. Ә шашлыксыз нинди ял - ял булсын, ди?!
Билгеле, табигать кочагында ял итү – эш процессының бер өлеше кебек, чөнки монда кешенең эш сыйфаты гына түгел, ә кешелеклелек сыйфатлары да ачыла. Һәм инде үз яныңда ГХАТ хезмәткәрләрен түгел, ә ял итәргә күңелле булган кешеләрне күрәсең һәм алар белән тагын да якынаясың!
Татарстан Республикасының хезмәт коллективлары Кырым Автоном Республикасының күпмилләтле халкына ярдәм күрсәтү инициативасы, теләге белән чыктылар.
Яр Чаллы шәһәре мэриясе һәм район администрациясе хезмәткәрләре Карым ярымутрау халкына ярдәм күрсәтү фондына үзләренең бер көнлек хезмәт хакларын күчерү турында карар чыгардылар.
ГХАТ идаресе эшчеләре дә бу тәкъдимне хупладылар.