ЯҢАЛЫКЛАР
2015 елның 15 май « Гаилә көнендә» Минзәлә районы ГХАТ бүлегендә Фәсхиев Шәүкәт белән Валиева Айгөлнең никахлары законлы рәвештә теркәлде. Шушы айның соңгы көннәрендә Шәүкәт армия сафларына басачак. Яшьләргә уңышлар телибез, гаиләләре ныклы булсын.
2015 елның 15 маенда- Гаилә көне уңаеннан, Җиңү көнендә дөньяга аваз салган ике сабыйны район сырхауханәсенең бала тудыру бүлегеннән озату тантана рәвешен алды: бәхетле әниләр балаларының Россия гражданнары булуларын раслаучы беренче документларын-туу турындагы таныклыкны район башлыгы Альберт Ильгизәр улы Рәхмәтуллин кулыннан алдылар.
Чирмешән районында яшәүче 11 гаиләгә тантаналы шартларда Ана (гаилә) капиталына сертификатлар тапшырылды. РФ Пенсия фондының район идарәсе начальнигы Гөлфия Гыймранова яшь әти-әниләрне сабыйлары туу белән тәбрикләде һәм әлеге капиталны нинди максатларда файдаланып булуын аңлатты. ЗАГС бүлеге начальнигы Наталья Карпова да бәхетле гаиләләрне котлап, аларга "Гаилә битләре" дигән пособиеләр тапшырды.
15 май халыкара гаилә көне уңаеннан, Балтач районы ГХАТ бүлеге хезмәткәрләре тантаналы рәвештә Кариле авылында гомер итүче Җәләловлар гаиләсен кызлары Газизә тууы белән котлап уздылар. Җәмгыятебезнең яшәү сыйфаты һәм рәвеше, чыннан да, шат сабыйлар авазы белән бәяләнә. Киләчәктә, Җәләловлар гаиләсенә бәхетле, озын гомер, балалар куанычын күреп яшәргә язсын!