Татарстан Республикасы Ведомстволары Татарстан Республикасы Министрлар Кабинетының гражданлык хәле актларын теркәү идарәсе

ЯҢАЛЫКЛАР

апрель, 2014 ел

чәршәмбе

Түбән Кама ГХАТ идарәсе белгечләре “Тоталь диктант” акциясендә катнашты

Түбән Кама муниципаль районы Гражданлык хәле актларын теркәү идарәсе белгечләре гомумрәсәй акциясе булган “Тоталь диктант-2014” тә катнашып, рус теле грамматикасы буенча үзләренең белемнәрен тикшерделәр. Быел әлеге акциядә 300 дән артык шәһәр катнашты. Халык арасында грамоталы, хатасыз итеп яза белүнең иң мөһим, иң кирәк сыйфатларның берсе икәнен Түбән Камада 348 кеше исбатларга тырышты. ГХАТ идарәсе белгечләренең сүзләренә караганда, диктант язу аларны, әйтерсең лә, балачакларына алып кайтып, күңел төпкеленең иң төбенә яшеренгән яшьлек хатирәләренең яңаруына сәбәпче булган. Алга таба да әлеге акциядә катнашачаклары көн кебек ачык, дип белдерде ГХАТ идарәсе белгечләре.

Ютазы районында юбилярларны тәбрикләделәр

15 апрель көнне Ютазы районы Башкарма комитетының ГХАТ бүлеге эшчеләре Урыссу бистәсендә яшәүче Биктимировлар парын 50 еллык гаилә бәйрәме белән котладылар.

Тәслимә Галимулловна һәм Флүр Әхмәдишович кулга кул тотынышып озак еллар мәхәббәтләрен саклап бәхетле гомер юлыннан атлыйлар.

Түбән Кама муниципаль районы ГХАТ идарәсендә ярәшү йоласын пропагандалау буенча актив эш алып барыла

Ярәшү - иң борынгы гореф-гадәтләрнең берсе. 2014 елның 16 апрель көнендә Түбән Кама муниципаль районы ГХАТ идарәсендә Артем Костин белән Юлия Харевич катнашында ярәшү йоласы булып узды.

Яшь парлар әти-әниләре һәм кунаклар алдында танталы рәвештә кияү белән кәләш дип игьлан ителделәр. Әлеге йоланың дулкынландыргыч мизгелләре – Артемның Юлиягә чәчәк бәйләме бүләк итүе һәм мәхәббәтен аңлатуы булды. Хуш исләр бөркелеп торган түгәрәк ипине яшьләр бер-берсенә авыз иттерделәр, әти-әниләрен сыйладылар.

апрель, 2014 ел

сишәмбе

Зәй мәктәпләрендә чираттагы «Гаилә дәресе»

Чираттагы «Гаилә дәресе» 2014 нче елның 15 апрелендә Зәй шәһәренең 4 мәктәбендә ГХАТ бүлегенең баш белгече Ландыш Ананьева һәм “Шатлык” социаль хезмәт күрсәтү үзәге психологы Юлия Комиссарова тарафыннан “Гаилә – бүген һәм иртәгә” дигән темага үткәрелде. Яшьүсмерләргә гаилә һәм никах өлкәсенә кагылышлы законнар, ир һәм хатынның бер–беренә һәм балаларына карата җаваплылыгы, гражданлык хәле актларын теркәү өлкәсендә электрон хезмәтләр күрсәтү турында сөйләнде. Гаилә тормышының кытыршы яклары психолог чыгышында яктыртылды. Балалар анкета сорауларына актив җавап биреп, темага кагылышлы тестларны чишеп, гаилә һәм никах өлкәсендәге белемнәрен ныгыттылар.

Мамадыш районында гомер итүче Абдуллиннар гаиләсе “Идел буе округының иң уңган гаиләсе – 2014” фестивалендә республикабыз данын яклаячак

Мамадыш районы Урта Кирмән авылында гомер итүче Абдуллиннар гаиләсе “Идел буе округының иң уңган гаиләсе – 2014” республикабыз данын фестивалендә яклаячак.

Мәртәбәле жюри игътибарына Абдуллиннар республика, район, үзләренең гаиләләре турында презентация һәм күргәзмә әзерләячәк. Әйтергә кирәк, аларның күрсәтер һәм сөйләр әйберләре бихисап. Бу талантлы гаиләне районда белмәгән кеше юктыр, мөгаен. Ришат һәм Ләйлә Абдуллинар инде күп еллар дәвамында Урта Кирмән авылы клубында хезмәт куя. Аларның куллары астында якын тирә авыллардан берничә буын артист үсте.

2014 нче елның 15 нче апрелендә видеоконференция режимында Татарстан Республикасы Министрлар Кабинеты ГХАТ идарәсенең чираттагы эшлекле киңәшмәсе үткәрелде

2014 нче елның 15 нче апрелендә видеоконференция режимында Татарстан Республикасы Министрлар Кабинеты ГХАТ Идарәсенең республика гражданлык хәле актларын теркәү вәкаләте бирелгән органнарының эшчәнлеге турында чираттагы эшлекле киңәшмәсе үткәрелде.

Киңәшмә Татарстан Республикасы Министрлар Кабинеты Аппаратының социаль үсеш Идарәсе җитәкчесе урынбасары – А.Р. Хабибуллин, Татарстан Республикасы Министрлар Кабинетының Гражданлык хәле актларын теркәү Идарәсе башлыгы – Э.А. Зарипова, Татарстан Республикасы буенча Россия Федерациясе юстиция Министрлык Идарәсе, Татарстан Республикасы Прокуратурасы, Татарстан Республикасы буенча Эчке эшләр министрлыгының икътисади иминлек һәм коррупциягә каршы көрәш Идарәсе хезмәткәрләре, шулай ук республиканың шәһәр төбәкләре һәм муниципаль район башкарма комитетларының ГХАТ бүлеге идарә башлыклары, җирле үзидарә органы җитәкчеләре, гражданлык хәле актларын теркәү вәкаләтен (урында) тормышка ашыруда катнашучы Татарстан Республикасы муниципаль районнарының шәһәр һәм авыл җирлекләре белгечләре катнашында узды.

Югары Ослан муниципаль районынында авыл җирлеге сәркатипләре белән җыелыш

2014 елның 15 апрелендә Югары Ослан муниципаль районы Башкарма комитетының ЗАГС бүлеге җитәкчесе авыл җирлеге сәркатипләре белән җыелыш үткәрде.

Җыелышта гражданнар хәле актларын теркәү буенча хокукларны үтәү, күпфункциональле үзәктә кабул итү буенча сораулар каралды һәм 2014 елның беренче кварталына нәтиҗәләр ясалды.

Түбән Кама райны Түбән Чаллы авылында яшәүче Гайнелгыйлем апага 90 яшь

Агымдагы елның 15 апрель көнендә Түбән Кама муниципаль районының Түбән Чаллы авылында гомер итүче Гайнелгыйлем апа Гатауллина 90 яшьлек юбилеен билгеләп үтте. Тыл хезмәткәре, хезмәт ветераны Гайнелгилем апаны әлеге күркәм юбилее белән Түбән Кама муниципаль районы Башкарма комитетының урынбасары Лида Тартмина котлады. Үзенең тормыш иптәше Фахрулла абзый белән Гайнелгыйлем апа ике кыз Резеда белән Гөлзидәне тәрбияләп үстерәләр. Бүген Гайнелгыйлем әби биш оныгының уңышларына сөенеп, алар өчен җан атып яши. Түбән Кама муниципаль районы Башкарма комитетының исеменнән Гайнелгыйлем апага чәчәкләр һәм истәлекле бүләк тапшырылды.

Ютазы районында юбилярларны тәбрикләделәр

15 апрель көнне Ютазы районы Башкарма комитетының ГХАТ бүлеге эшчеләре Урыссу бистәсендә яшәүче Миннухановлар парын 52 еллык гаилә бәйрәме белән котладылар.

Гөлсинә Әхмәтгалиевна һәм Илгизәр Мугинович кулга кул тотынышып озак еллар мәхәббәтләрен саклап бәхетле гомер юлыннан атлыйлар.

апрель, 2014 ел

дүшәмбе

Татарстан Республикасы ГХАТ бүлекләренең эшчәнлеге “ЗАГС” журналы битләрендә

Бөтенроссия профильле “ЗАГС” журналының яңа саны (4/2014) басылып чыкты. Әлеге журнал битләрендә Татарстан Республикасы ГХАТ бүлекләренең эшчәнлеген чагылдырган материаллар белән танышып була.

Яңалыклар бүлегендә Татарстан Республикасы Министрлар Кабинетының гражданлык хәле актларын теркәү идарәсенең Татарстан Республикасы ГХАТ органы хезмәткәрләренең квалификациясен арттыру курсларын оештыруы хакында хәбәр ителә.

Татарстан Республикасы Мамадыш муниципаль районы башкарма комитеты ГХАТ бүлегендә яшь мамадышлыларга беренче паспортларын тапшыру чарасы гореф-гадәткә әйләнгән, һәм әлеге матур күренеш журнал битләрендә дә чагылыш тапкан.

Моннан алдагы бит Алдагы бит

Датасы буенча тикшерү

ЯҢАЛЫКЛАРГА ЯЗЫЛУ