ЯҢАЛЫКЛАР

      2014 елның 22 апрель көнне Яр Чаллы шәһәренең Тантаналар сараенда яшь гражданнарга паспортлар тапшыру тантанасы узды. Бәйрәмне Яр Чаллы шәһәренең ГХАТ идарәсе башлыгы урынбасары Галиуллина Раушания Мөҗәһит кызы ачты. Паспорт-виза хезмәте ветераны, № 2 полиция бүлеге Ветераннар советы председателе урынбасары З.К.Фомина 44 яшь гражданга паспорт тапшырды.

      Бүген, 2014 елның 22 апрель көнендә, Татарстан Республикасы Азнакай муниципаль районы башкарма комитеты ЗАГС бүлеге Азат һәм Гүзәл Тимбаковлар гаиләсендә икенче һәм өченче бала булып туган илебезнең гражданнары, тагын ике азнакайлының дөньяга тууын тантаналы рәвештә бала тудыру йортында теркәде.

     Районның Гражданлык хәлләрен теркәү бүлегендә Яр Чаллы шәһәренең социаль–педагогик технологияләр һәм ресурслар институтының “Тарих, архив” факультеты студентлары тәҗрибә туплый. Алар Гражданлык хәлләрен теркәү бүлегенең тарихын өйрәнәләр, теория,эзләнү, иҗади-гәмали эшчәнлекләре буенча тәҗрибә туплыйлар, белемнәрен арттылар. 

       22 апрель көнне Куныр урта мәктәбендә Бөек Ватан сугышы чоры балалары белән “Сезнең сабырлыкка, сезнең батырлыкка - мәңге-мәңге хәйран калырлык” дигән очрашу булды. Очрашуда Куныр, Дорга, Шода авылларыннан 41 кеше катнашты. Кичәне мәктәп укучылары бик эчтәлекле, сугыш чоры турында видеороликлар күрсәтеп, күңелләргә тиярлек итеп алып бардылар. Ә балачаклары сугыш чорына эләккән абыйлар-апалар үзләренең тормышларын, истә калган вакыйгаларны сөйләп күңелләрне тетрәндерделәр, күпләрнең күзләрендә яшь иде. Сөйләшүләр чәй өстәле артында дәвам итте. Куныр авыл җирлегенең җитәкче урынбасары Илзия Нәҗипова кунакларга үзенең җылы теләкләрен юллады.

      Татарстан республикасы шәһәр һәм муниципаль  районнарында санитар-экологик икеайлыгы башланды. Шул уңайдан Кукмара районында да субботниклар бара. 22 апрель, В.И.Ленинның туган көне уңаеннан, Кукмара районы Башкарма комитеты хезмәткәрләре белән берлектә ЗАГС белгечләре дә якын-тирә территорияне һәм “Ленин бакчасын” җыештыруда актив катнаштылар.

      2014 нче елның 22 апрелендә «Космос» Яшьләр үзәге һәм Зәй муниципаль районы ГХАТ бүлеге белгечләре яшь гаилә коручы парлар өчен «Бәхет телибез Сезгә!» дип аталган чара үткәрделәр. Егет–кызларга махсус бәйгеләрдә, тестларда катнашу бер-берсен яхшырак белергә ярдәм итте. Психолог Юлия Комиссарова чыгышында яшь гаиләдә кризис чорларын үткәреп җибәрү ысуллары турында сөйләнде.