Гаиләдә бала туу – иң сөенечле вакыйгаларның берсе дияргә мөмкин

Бала - ул чиксез ләззәт чыганагы: нарасые янында һәр ата-ана ял һәм куаныч таба. Ә игезәк бала туса, икеләтә шатлыктыр, мөгаен.

    Мамадыш шәһәрендә туып үскән, ә хәзер Яр Чаллы шәһәрендә гомер итүче, хөрмәтле яшь Хисматовлар гаиләсендә икеләтә сөенеч – 2016 нчы елның 14 гыйнвар көнендә игезәк малай -балалары туды. Малайларга ата-аналары күркәм мәгънәле исемнәр сайлаганнар – Азамат һәм Салават. Татар исемнәре сүзлегенә күз салсаң, Азамат исеме - баһадир, кыюлыкны, ә Салават - догалар, мактау җыры, фатихә бирү дигән мәгънәгә ия. Азамат белән Салават - гаиләдә икенче һәм өченче балалар, апалары Адилә   өчен көтеп алынган энекәшләр.

       27 нче февраль көнне Ришат белән Гүзәлия Мамадыш районы Башкарма комитеты ГХАТ бүлегендә тантаналы рәвештә малайларының беренче документларын – туу турында таныклыкларын алдылар. ГХАТ бүлеге хезмәткәре Фәния Гаязова яшь ата-ананы гаиләләрендә сабыйлар туу сөенече белән чын күңелдән тәбрикләп Мамадыш районы   башлыгы Анатолий Петрович Иванов исеменнән котлау хатын, открыткалар  һәм истәлекле бүләкләр тапшырдылар.