Татарстан Республикасы Министрлар Кабинетының гражданлык хәле актларын теркәү идарәсе

Бу айда 90 яшьлек юбилейлары уңаеннан котлаулар кабул итүчеләр арасында Бөек Ватан сугышы ветераны Елизавета Глущенко да бар

2013 елның 26 ноябре, сишәмбе

20 ноябрьдә Нурлат шәһәренең социаль яклау идарәсе, ГХАТ бүлеге, хәрби комиссариат хезмәткәрләре ветеранны истәлекле бәйрәме белән район җитәкчелеге исеменнән тәбрикләделәр.
Кече сержант Елизавета Глущенко икенче танк дивизиясенең 3нче танк корпусы сафларында хезмәт итә. Ул радистка була, фронтның алгы сызыгын элемтә белән тәэмин итеп тора, сугышчан батырлыклары өчен медальләр белән бүләкләнгән. Хәтереннән күп нәрсәләр җуелса да, кайбер вакыйгалар әле дә күз алдыннан китми, ди
– Мин ниләр генә күрмәдем. Җир астында да калдым, бервакыт елга кичкәндә бата яздым, авыр яраландым. Ике ел буе бер үк портянкалар чорнап йөрдем, лычма суга баткан аяклар белән йокларга да туры килгәләде. Ә куркуны җиңеп, ни рәвешле итеп сынауларны узганыбыз турында сөйләп тә торасы юк, – дип күз яшьләре аша дәһшәтле елларны искә төшерә Елизавета Ивановна һәм тыныч кына өсти дә: – Ә бит сугыштан исән чыгу гына түгел, шундый мөхтәрәм яшькә дә җитә алдым.
Сугыш аның өчен сынау гына булып калмый әле. Яшь радистка анда үзенең булачак ирен дә очрата. Ул да элемтәче була һәм полковник дәрәҗәсенә кадәр хезмәт итә. Алар озак еллар Ригада яшиләр, ә ире вафат булгач, Елизавета Глущенко Нурлатка сеңлесе янына күченә. “Туганнар янәшәдә булганда, җиңелрәк”, – ди ветеран.

БАРЛЫК ЯҢАЛЫКЛАРНЫ УКУ