ЗАГС идарәсе җитәкчесе Эльвира Әхмәтова сугыш ветераннарына "1941-1945 еллардагы Бөек Ватан сугышында Җиңүгә 80 ел" медальләрен тапшырды
2025 елда Россиядә 1941-1945 еллардагы Бөек Ватан сугышында Җиңүнең 80 еллыгын бәйрәм итү планлаштырыла. 2025 ел бу юбилей уңаеннан Илдә Ватанны саклаучылар елы дип игълан ителде.
Бу юбилей безгә азатлык һәм тынычлык өчен көрәштә үз гомерләрен биргән миллионлаган совет солдатларының һәм гражданнарының батырлыгын искә төшерү булып хезмәт итә. Бу совет халкының фронтларда сугышып, тылдагы хезмәте белән фронтка ярдәм итеп, бердәм гаилә булып яшәве, җиңү өчен чиксез авырлыклар кичергән сугышчыларның һәм хезмәтчәннәрнең батырлыгы турындагы истәлек йөрәкләрне горурлык һәм хөрмәт белән тутыра. Безнең халык үзенең көче, бердәмлеге һәм гаделлеккә ышанычы белән иң авыр сынауларны җиңеп, җиңүгә иреште.
Әлеге истәлекле дата уңаеннан, 27 мартта Татарстан Республикасы Министрлар Кабинетының ЗАГС Идарәсе тарафыннан сугыш ветераннары Фәүзия Батыршинага, Валентина Ивановнага, Сәрия Сафинага, Суфия Сөләймановага «1941-1945 еллардагы Бөек Ватан сугышында Җиңүгә 80 ел» медальләре тапшырылды.
Министрлар Кабинетының ЗАГС идарәсе җитәкчесе Эльвира Әхмәтова ветераннарны чын күңелдән котлады һәм җиңүгә керткән зур өлешләре һәм сугыш елларындагы фидакарьлекләре өчен рәхмәт белдерде.
Фәүзия Батыршинага фронтка киткәндә 18 яшь була. Ул зенитчы булып хезмәт иткән. Ул җиңү белән өйгә кайтканнарын яхшы хәтерли. Һәр тукталыш мәйданчыгында алар чыгалар һәм аларны чәчәкләр белән каршы алалар, һәркайда гармун тавышы ишетелә, кешеләр шатланалар. Бу онытылмаслык иде. Ире Гарифулла Галиулла улы белән 3 бала үстерәләр. Ләкин ире бик иртә үлде. Тол калганда олысына 8 яшь, уртанчысына 5 яшь, кечесенә 10 ай була. Фәүзия ханым берүзе балаларны үстерә, укыта. Ул гомер буе укытучы булып эшләде. Аның укытучылык стажы кырык ел тәшкил итә. Бүгенге көнгә кадәр Фәүзия Сөнәгат кызына белем һәм тәрбия биргән рәхмәтле укучылар килеп йөри.
Ире Гарифулла Галиулла улы Батыршин да Бөек Ватан сугышында катнашкан. Алар гаиләдән фронтка биш абый киткән. Гарифулланың дүрт абыйсы үлде, бары ул гына кайтты. Тыныч вакытта мәктәп директоры булып эшли.
Сугыш ветераннарының сугышчан казанышлары, тыныч тормышка керткән өлеше, ватанпәрвәрлеге һәм җиңүгә ышанычы киләчәк буыннар өчен үрнәк булып тора.