Азнакай муниципаль районында Сираевлар гаиләсендә беренче бала туу теркәлде
Яз сулышы сизелә, кошлар сайрый, кояш нурлары күңелләрне күтәрә. Нәкъ менә шундый матур көнне зур могҗиза булды - Айнур һәм Алина Сираевлар гаиләсендә беренче бала дөньяга килде. Бәхетле әти – әнидән сабыйга беренче бүләк-Әмирхан исеме бирелде.
Азнакай районы башкарма комитеты ГХАТ бүлегендә Сираев Әмирхан Айнур улының туган көне уңаеннан тантаналы рәвештә теркәу утте. Исем кушу тантанасында сабыйның туганнары һәм якыннары, шулай ук әти-әниләренең хезмәт коллективлары катнашты. Бүлекнең баш белгече Шакирова Светлана ата-анага улларынын беренче һәм иң төп документын - туу турында таныклыгын һәм Татарстан Республикасы Президенты Р. Н. Миңнеханов исеменнән котлау хаты тапшырды. Бүлек башлыгы Элфинур Хәйретдинова яшь әти-әниләрне котлап: «Үз мөнәсәбәтләрегез мисалында гына балаларны яратырга һәм тирә-юньдәге кешеләрне хөрмәт итәргә өйрәтә алуыгызны истә тотыгыз - бу катлаулы бурыч. Балалар – безнең киләчәгебез, илебезнең киләчәге»,- диде. Аның котлауларына башка кунаклар да кушылды.