Бөгелмәнең ГХАТ бүлеге 2019 ел башыннан алып, 200 бала тууын теркәде

2019 елның 28 марты, пәнҗешәмбе

 Бөгелмәнең ГХАТ бүлеге 28 март көнне 2019 ел башыннан алып, 200 бала тууын теркәде. Кыз бала «юбилейлы» булды. Сабыйның әти-әниләре Лилия Рафаил кызы һәм Алексей Михайлович Морозовлар кызлары өчен Мира исемен сайлаганнар. Мира исеменең мәгънәсе – күпмилләтле. Славян вариантында ул тынычлык дигәнне аңлата. Әгәр Көнчыгышны алсаң, ул «принцесса», «княжна» булачак. Исем япония теленнән – «киләчәк хәзинәсе». Морозовлар гаиләсендә Мира икенче бала, ә беренче кызлары Ева исемле.

Бүлек хезмәткәрләре Алексейга кызлары туу турында таныклык, шулай ук Татарстан Республикасы Президенты исеменнән котлау открыткасы һәм истәлекле бүләк тапшырдылар, сабыйларын тәрбияләүдә сабырлык һәм зирәклек теләделәр.