Әлмәт шәһәрендә «Алтын юбилярлар"
Искиткеч бәйрәм – «Алтын туй"! Уртак шатлык һәм уртак кайгы. Уртак сулыш һәм бер йөрәк ритмы, уртак киң мәхәббәт һәм бер язмыш.
3 декабрьдә Әлмәт шәһәрендә Ямаевлар Борис Яков улы һәм Зоя Прокопий кызы бергә яшәүләренә 50 ел тулуны билгеләп үттеләр.
50 ел бергә булу - үткәргән һәр мизгелне бәяли белү, бер-береңә түземле булу, бер-береңне гафу итә белү һәм бер-береңне кайгырта белү ул.
Борис Яков улы һәм Зоя Прокопий кызы тормышлары буйлап нәкъ менә шулай бергә атлыйлар. Бәхетле гаиләдә алар өч бала тәрбияләп үстергәннәр, аларга дүрт онык һәм өч оныкчык бүләк иттеләр.
Хатыны һәм ире турында: «тормыш юлдашы», - диләр. Яхшы юлдаш янәшәдә генә атлаучы түгел. Ул текә сукмакларда таеп егылырга бирмәүче, тауларга менәргә ярдәм итүче кеше. Юбилярлар әйтүенчә, алар беренче караштан бер-берсенә гашыйк булганнар. Ә аларның озын һәм бәхетле тормыш сере - бер-береңне хөрмәт итү, шатлыкларны уртаклаша белү һәм авырлыкларны бергә кичерү дип саныйлар.
Әлмәт муниципаль районы башкарма комитеты ГХАТ Идарәсе белгече юбилярларны котлап, ГХАТ идарәсе җитәкчесе исеменнән әлеге истәлекле дата белән котлады һәм «Әлмәт хәбәрләре» газетасына язылу бүләк итте.
Хөрмәтле юбилярлар! Сезнең җилкәләрегез артында озын, матур һәм бәхетле тормыш. Бүген сез элеккечә яшь күңелле һәм тормышны яратасыз. Озак вакытлар дәверендә тикшерелгән гаилә мөнәсәбәтегез чисталык һәм тугрылык үрнәге булып тора.
Сезнең хисләрегез киләчәктә дә көч һәм оптимизм чыганагы булсын. Сезгә нык сәламәтлек, күңел тигезлеге, тынычлык һәм игелек телибез!