Олы Кайбыч авылында яшәүче Әминә Габдрахманованы 95 яшьлек юбилее белән котладылар
Юбилярны котларга килгән, Район башлыгы Альберт Рәхмәтуллин, әбинең картлыгы бәхетле булуын әйтте.
- Сезгә иң мөһиме, исәнлек-саулык телим. Калганы бик әйбәт, йорт-җирегез дә матур. Сезнең буын вәкилләре авырлыкларны күп күргән. Намуслы хезмәтегез өчен рәхмәт әйтеп, илебез Президенты Владимир Путин җибәргән котлау хатын һәм үземнең бүләгемне дә кабул итеп алыгыз, - диде ул.
Тормыш иптәше – сугыш ветераны Рәхимулла абый белән җиде балага гомер биргәннәр.
- Саулыгын да бирә күрсен, акыллы киңәшләре белән барыбызга да ныклы терәк ул, - ди кызы Гөлнур.
Әбекәй үзе дә якыннары өчен дога кыла.
- Киявемә дә, кызыма да Алланың рәхмәте яусын. Мине хөрмәт итеп килүчеләргә дә рәхмәт. Һәрберсенә гаилә тынычлыгы телим, хәвеф-хәтәр, борчу-хәсрәт күрмәсеннәр. Озын гомер – Ходайдан бирелгән бүләк ул. Беркайчан да кешенекен күпсенмәдем, тыныч кына гомер кичердем, - диде Кремльдән килгән хатны икенче тапкыр алган юбиляр.