Мөслим районында 2016 елның беренче баласы теркәлде
2016 ел һәр гаилә өчен төрлечә башланды, әмма барыннан да күбрәк, мөгаен, Мөслим районында уңыш Кашаповлар гаиләсенә елмайды.
Ринат һәм Айсылу Кашаповларның 2016 елның 5 гыйнварында кызы туды, һәм ул безнең ГХАТ бүлегендә быел беренче бала булып теркәлде.
Әлбәттә, ата-аналар өчен бәләкәчнең ничәнче булып тууы бөтенләй мөһим түгел: беренчеме, 25 нчеме, яки 50нчеме, чөнки алар өчен ул – бердәнбер һәм кабатланмас. Беренче булып кыз – тормыш дәвамчысы дөньяга килгән.
2016 елның 11 гыйнварында ЗАГС бүлеге кызның тууын теркәде, әти-әниләре аңа Ралина дип матур исем куштылар.
Әни белән әти балага беренче тормыш документын – туу турында таныклыгын алырга килде. Кашаповлар гаиләсенә балаларының сау-сәламәт үсүен, мәрхәмәтле бала булуын һәм бары тик шатлык кына китерүен телибез. Төкле аягың белән, Ралина!