Гаилә учагы уты белән капсула тапшырылды
Бүген, 8 апрельдә, Ютазы муниципаль районы ГХАТ бүлегендә Гаилә учагы капсуласын Азнакай районына тапшыруга багышланган тантаналы чара узды. Гаилә учагы капсуласы 1 апрельдә Урыссу бистәсеннән Абрамовлар гаиләсе тарафыннан Ютазы муниципаль районына китерелде. Чара кысаларында бергә яшәүнең 50 еллыгын билгеләп үткән Гарифҗановлар гаиләсен, күп балалы гаиләләр Фаздуллиннар һәм Ханиповларны хөрмәтләделәр. Чарада катнашучыларны Ютазы муниципаль районы Башкарма комитеты җитәкчесе Светлана Самонина һәм Азнакай район Советы Аппараты җитәкчесе Айдар Хәлиуллин сәламләде. Абрамовларның гаиләсе Азнакай районыннан Хәмидуллиннар гаиләсенә утлы капсуланы рәсми рәвештә тапшырды. 2024 ел Россия Федерациясе Президенты В.В. Путин тарафыннан Гаилә елы дип игълан ителде. Аның символы булып Мәскәүдә ВДНХда «Россия» күргәзмәсендә кабызылган «Россия йөрәге» Бөтенроссия гаилә учагы тора.