Чүпрәле районында «Гаиләгә ярдәм» проекты кысаларында күчмә чаралар узды.
«Гаиләгә ярдәм» проекты кысаларында Татарстан Республикасында Бала хокуклары буенча вәкаләтле вәкил һәм Балигъ булмаганнар эшләре буенча республика комиссиясе ярдәмендә биредә Балигъ булмаганнар эшләре һәм аларның хокукларын яклау комиссиясенең (КДНиЗП) киңәйтелгән утырышы узды. Аның эшендә Чүпрәле районы башлыгы Марат Гафаров, ТРда Бала хокуклары буенча вәкаләтле вәкил Светлана Захарова, республика КДНиЗП җаваплы секретаре Илсөяр Гарифуллина, ТР Дәүләт Советы депутаты Ринат Гайзатуллин, район прокуроры Ришат Купкенов, шулай ук опека, мәгариф һәм социаль яклау, мәгариф органнары вәкилләре катнашты.
Утырыш белән беррәттән район халкы өчен гражданнарны комплекслы кабул итү оештырылды. Кешеләр торак проблемаларына, социаль һәм юридик ярдәм чараларына кагылышлы сораулар белән мөрәҗәгать иттеләр.
Җирле ЗАГС бүлегендә «Гаилә кыйммәтләре нигезләре» дигән түгәрәк өстәл узды, анда психологлар, дин әһелләре, студентлар һәм мәктәп укучылары катнашты. Татарстан Республикасы Министрлар Кабинетының ЗАГС идарәсе башлыгы урынбасары Данис Сәләхетдинов үз чыгышында гаиләләргә ярдәм күрсәтүгә юнәлдерелгән чараларның әһәмияте чиксез зур булуын ассызыклады.
Бу көннең нәтиҗәсе «Татарстан — Яңа гасыр» хәрәкәтенең җирле бүлекчәсе конференциясе булды. Активистлар һәм яшьләр секторы вәкилләре районның үсеш планнары һәм үсеп килүче буынга ярдәм итүгә юнәлдерелгән яңа проектлар турында фикер алыштылар.