Арча муниципаль районында гаилә, мәхәббәт һәм тугрылык көне
Гаилә, мәхәббәт һәм тугрылык көнендә, 2021 елның 8 июлендә шәһәребездә Арча муниципаль районы башлыгы Нуриев Илшат Габделфәрт улы һәм аның тормыш иптәше Гөлнур Тәлгать кызы исеменнән районның иң яхшы гаиләләрен кабул итү тантанасы узды. Мондый мөһим һәм әһәмиятле чара районда беренче тапкыр оештырылды.
Кабул итүнең мәртәбәле кунаклары арасында гаилә тормышы юбилярлары, күп балалы ата-аналар, хезмәт династияләре вәкилләре, якташлары арасында хөрмәткә лаек гаилә парлары бар иде.
Алар барысы да үз урынында, үз һөнәрләрендә илебез хакына хезмәт куйган һәм, үз хезмәтләре белән хөрмәткә лаек кешеләр. Нәкъ менә алар авылда уңышлы тормыш алып бару үрнәге булып торалар, һәм шуның белән беррәттән гаилә кыйммәтләрен саклап калуның лаеклы үрнәген үз балаларына, оныкларына тапшыралар.
«Сезне чын күңелдән якты гаилә бәйрәме-Гаилә, мәхәббәт һәм тугрылык көне белән котлыйм! Ныклы һәм тату гаилә, кадерле һәм якын кешеләр безне чын-чынлап бәхетле итә, ихлас мәхәббәт бүләк итә. Кадерле хатын-кызлар, сезгә баш иябез. Нәкъ менә сез-учакны саклаучылар!», - дип котлады чарада катнашучыларны район башлыгы Нуриев И.Г.
Үрнәк авыл җирлегеннән Даниал Нәфыйк улы һәм Дания Нуретдин кызы Низамовлар гаиләсенә тантаналы рәвештә «Мәхәббәт һәм тугрылык өчен» медале тапшырылды. 2021 елның 16 июльдә гаилә сапфир туйларын, 45 ел бергә гомер итүләрен билгеләп үтәчәк. Тантанада катнашучылар гаилә бәхетенең серләре белән уртаклаштылар һәм озак елларга гаилә берлеген ничек саклап калу турында сөйләделәр.
Чакырылган артистларының, Зөфәр Билалов һәм Зәйнәп Фәрхетдинованың ихласлыгы залда кабатланмас шатлык һәм бәхет атмосферасы тудырды һәм беркемне дә битараф калдырмады. Кунаклар үз чиратында артистларга кушылып җырладылар, матур җырлар астында биеделәр.