Түбән Камада Бөтенрәсәй “Гаилә, мәхәббәт һәм тугрылык көнен” зурлап билгеләп үттеләр
8 нче июль көнне Түбән Кама муниципаль районы ГХАТ идарәсендә “Гаилә, мәхәббәт һәм тугрылык ” көне уңаеннан зур бәйрәм үтте.
Бәйрәм чарасы кияү һәм кәләшләрнең парадыннан башланып китте. Зәңгәр күкне колачлап очкан ап-ак күгәрченнәр барыбызга да мәхәббәт, тигезлек һәм бәхет өләштеләр. Борынгы ярәшү йоласы, исем кушу тантанасы, гаилә юбилейлары парады, тормышларын корып яши башлауларына бары бер генә ел тулган гаиләләр белән очрашып төрле кызыклы уеннар уйнау – болар барысы да бәйрәмнең күрке булып тордылар.
Бөтенрәсәй “Гаилә, мәхәббәт һәм тугрылык ” көне уңаеннан уздырылган бәйрәм чарасының кульминациясе булып “Мәхәббәт һәм тугрылык” медален тапшыру тантанасы булды.
Барлыгы 2008 нче елдан башлап Түбән Кама муниципаль районында 12 комплект медаль тапшырылган.
8 нче июль көнне ГХАТ идарәсенә бәйрәмгә килгән балалар да, өлкәннәр дә рәхәтләнеп ял иттеләр, концерт карап хозурландылар.