Татарстан Республикасы Министрлар Кабинетының гражданлык хәле актларын теркәү идарәсе

Түбән Кама муниципаль районы ГХАТ идарәсендә Ачык ишекләр көне булып узды

2014 елның 16 апреле, чәршәмбе

Агымдагы елның 16 апрелендә Түбән Кама муниципаль районы Гражданлык хәле актларын теркәү идарәсендә Ачык ишекләр көне дип исемләнгән тантаналы чара булып узды. Әлеге бәйрәмгә якын арада никахларын рәсмиләштерергә теләк белдергән яшь парлар белән берлектә шәһәребезнең төрле уку йортларының талибәләре дә чакырулы иде. Гомумән, ачык ишекләр көненә, исеме җисеменә туры килеп тора торган чара буларак, булачак кияү-кәләшләрнең әти-әниләре, туган-тумачалары да килгән иде. Никахлашырга теләк белдерүче яшь шәһәрдәшләребезнең соңгы арада борынгы ярәшү йоласы турында аеруча күп кызыксына башлауларын истә тотып, бәйрәм ярәшү йоласыннан башланып китте. Залда утыручы күпләрнең бу искиткеч гүзәл, тирән мәгънәгә ия йоланы беренче күрүләре иде. Һәм, әйтергә кирәк, ярәшү йоласы турында күп кенә сораулар да яңгырады, байтак кына яшь парлар әлеге йолада катнашырга теләкләре барлыгын да җиткерде. ГХАТ идарәсе белгечләренең тагын бер табышлары – ул да булса театральләштерелгән тамаша аркылы тормышыбызда еш очрый торган теге яки бу ситуацияләрдән чыгу юлларын күрсәтү. Әйтик, никахсыз туган сабыйны ничек итеп рәсми рәвештә “әтиле” итәргә була, никахлашырга ничек итеп гариза бирергә, исем яки фамилиянең яңгыравыксыз, колакка ятышсыз очракларында кая мөрәҗәгать итәргә кирәклеге турындагы сценкалар яшьләрдә аеруча зур кызыксыну уятты. Ачык ишекләр көненең төп максаты - ГХАТ идарәсенең төп эше белән аваздаш. Ул да булса – гаилә кыйммәтләрен популярлаштыру, яшь буында җаваплылык хисе, бер-береңә карата хөрмәт хисе, миһербан-шәфкать тәрбияләү.

ФОТОРЕПОРТАЖНЫ КАРАУ Фоторепортаж

БАРЛЫК ЯҢАЛЫКЛАРНЫ УКУ