«Шәҗәрә бәйрәме» гаилә фестивале
Казан Цумда Гаилә, мәхәббәт һәм тугрылык көненә багышланган «Шәҗәрә бәйрәме» гаилә фестивале узды. Казан гаилә кыйммәтләренең эпицентрына әверелә. Цумның яңа мәйданчыгында "Шәҗәрә бәйрәме" VI Казан гаилә фестивале узды. Бөтенроссия Гаилә, мәхәббәт һәм тугрылык көненә багышланган бу зур вакыйга йөзләгән кешене үз тамырларын тикшерү, тәҗрибә уртаклашу һәм төрле халыкларның күпкырлы гореф-гадәтләре дөньясында берләштерде. Сәхнәдә ярты гасырдан артык бергә яшәгән гаиләләрне, күп балалы гаиләләрне һәм СВОда катнашучыларның гаиләләрен хөрмәтләделәр. Аларның ныклык, тугрылык һәм мәхәббәт тарихлары барлык кунаклар өчен төп илһам чыганагы булды.
Фестиваль Татарстан Республикасы Министрлар Кабинетының ЗАГС идарәсе ярдәмендә уза. Фестивальдә Татарстан Халыклары ассамблеясе Советы башкарма комитеты җитәкчесе, ТР Дәүләт Советы депутаты Ренат Вәлиуллин, Арча районы башлыгы Алмаз Хисаметдинов, Казан Башкарма комитетының иҗтимагый оешмалар белән хезмәттәшлек бүлеге җитәкчесе Илгиз Сарманов, «Гаилә» мәчете имам-хатыйбы Рөстәм Хәйруллин һәм башкалар катнашты.Фестиваль күп балалы гаиләләрне, парларны хөрмәтләү белән ачылды. 50 елдан артык бергә яшәгән гаиләләр һәм СВОда катнашучыларның гаиләләре сәхнәгә күтәрелде. Шундый парларның берсе - Усад авылыннан Алексей һәм Лия Камашевлар гаиләсе, алар 10 бала тәрбиялиләр, шуларның 6сы тәрбиягә алынган.
Татарстан Республикасы Министрлар Кабинетының ЗАГС идарәсе башлыгы урынбасары Данис Сәләхетдинов гаиләләрне котлады һәм ведомство исеменнән Рәхмәт хатлары тапшырды һәм гаиләләрне «Мәхәббәт һәм тугрылык өчен» медальләре белән бүләкләде. Данис Хәнифович ассызыклаганча, мондый парлар үз үрнәкләре белән җәмгыятьнең нигезе булган традицион гаилә кыйммәтләрен саклыйлар һәм ныгыталар.
Бу җылы көн зур республика акциясенең бер өлеше булды - хәзер Татарстанда «Гаилә атнасы» ның иң кызган чагы, аның кысаларында барлык шәһәрләрдә һәм районнарда 707 төрле чара уза.