Россия көнендә 11 яшь баулылы үзенең беренче паспортын алды
Иртәдән "Нефтьче" стадионына барып Россия көнен бәйрәм итергә җыенган күп кенә баулылыларда шик туды: һава торышы аркасында бәйрәм булырмы, юкмы? Иртә таңнан койган яңгыр туктарга җыенмаган кебек тоелды. Әмма, бернигә дә карамастан, зонтиклар тотып бәйрәмгә барган кешеләрне күреп, һава торышы үзенең кәефен үзгәртергә булды: башта яңгыр туктады, аннары болытлар артыннан кояш чыкты.
Бәйрәмгә килгән Баулы халкының кәефе әйбәт, кояшлы иде. Баулылылар Осталар шәһәрендә кулдан эшләнгән әйберләр күргәзмәсендә сувенирлар сатып ала алдылар, "Минем Россия - минем илем" бәйрәм концертын карадылар, 14 яше тулган 11 баланы иң төп документ -беренче паспорт алган көннәре белән котладылар.
Бәйрәм кысаларында мөмкинлекләре чикле балаларның “Благо” театр студиясен үстерү өчен акча җыюга багышланган хәйрия марафоны үтте.