Агымдагы елның июнь аенда Түбән Кама районы ГХАТ идарәсендә туу турында 370 актлар язуы төзелде. Бу соңгы өч ел дәвамында булган иң зур күрсәткеч. 2013, 2014 нче елларны җәйнең беренче аенда туу турында 310 актлар язуы төзелгән булса, быел әлеге сан алтмышка артык. Балаларга кушыла торган исемнәргә килсәк, июнь аенда малайларга иң сирәк кушыла торган исем – Аксён булса, кыз исемнәре арасында Сафида, Анэль, Майя исемнәре сирәк очрый торганнар рәтеннән. Иң популяр исемнәр арасында беренчелекне Артур, Тимур, Кәрим, Матвей, Елизавета, Кира, Виктория исемнәре тота.