Татарстан Республикасы Министрлар Кабинеты ГХАТ идарәсенә Альбина Шәвәлиева җитәкчелек итәчәк

ТР Министрлар Кабинетының ЗАГС идарәсе җитәкчесе вазыйфаларын башкаручы итеп Альбина Шәвәлиева билгеләнде, ул элек Казан шәһәре Башкарма комитетының ЗАГС идарәсе җитәкчесе иде. Яңа җитәккчене ТР Премьер-министры вазыйфаларын башкаручы Алексей Песошин республика идарәсе коллективына тәкъдим итте.

А.Песошин ТР Министрлар Кабинетының ЗАГС идарәсе хезмәткәрләренә мөрәҗәгать итеп,элеккеге җитәкче Эльмира Зарипованың ТР хезмәт, халыкны эш белән тәэмин итү һәм социаль яклау министры итеп билгеләнүен искә төшерде. Ул Республика Хөкүмәте исеменнән аңа ЗАГС идарәсе җитәкчесе вазыйфасындагы эшчәнлеге өчен рәхмәт белдерде.

“Аның 2008-2014 еллар дәвамындагы эшчәнлек чорында зур күләмле оештыру эшләре, шулай ук электрон база һәм мәгълүмат системасын кертү буенча эш башкарылды, - дип билгеләп үтте Алексей Песошин. – Иң мөһиме сез Татарстанда демографик рекордны теркәдегез һәм Россия Президентының “май указлары”н гамәлгә ашыруда зур өлеш керттегез”.
Ул Эльмира Зариповага ТР Президентының Рәхмәт хатын тапшырды һәм яңа вазыйфада уңышлар теләде.

Алексей Песошин, ЗАГС идарәсе җитәкчесе вазыйфасы мөһим һәм четерекле дә. Шуңа күрә бу вазыйфага эш тәҗрибәсе булган кешене билгеләү карар ителде, дип белдерде.

Ул элек Казан шәһәре Башкарма комитеты ЗАГС идарәсе җитәкчесе вазыйфасын башкарган Альбина Шәвәлиеваның ТР Министрлар Кабинеты ЗАГС идарәсе җитәкчесе вазыйфаларын башкаручы итеп билгеләнүе турындагы указны укыды.

“Идарәнең барлык традицияләре дә дәвам ителәчәгенә ышанам, төгәл, ышанычлы һәм нәтиҗәле эшчәнлек телим”, - диде А.Песошин.

Белешмә өчен:
Шәвәлиева Альбина Рафаил кызы

1977 елның 8 августында Казанда туган.
Югары белемле. 1999 елда юриспруденция белгечлеге буенча В.И.Ульянов-Ленин исем. Казан дәүләт университетын тәмамлаган.

12.1999-08.2003 – «Клишин и партнеры» территорияара адвокатлар коллегиясендә стажер, адвокат;

08.2003- 04.2006 - «Адвокат Б.С.Рыбак и партнеры» коммерциячел булмаган партнерлык адвокатлар коллегиясе, адвокат;

04.2006-03.2007 – Казан шәһәре Башкарма комитеты, Эшләр белән идарә итү, баш белгеч; ЗАГС идарәсе башлыгы урынбасары, җитәкчесе вазыйфаларын башкаручы;

30.03.2007 – октябрь 2014 – Казан шәһәре Башкарма комитетының ЗАГС идарәсе җитәкчесе.

2014 елның октябреннән – ТР Министрлар Кабинетының ЗАГС идарәсе җитәкчесе вазыйфаларын башкаручы.



ТР Президенты матбугат хезмәте. Михаил Миронов