Буа муниципаль районында Халыкара гаилә көне – 2014

Быел 20 тапкыр дөньяда иң якты һәм игътибарга лаек бәйрәмнәрнең берсе булган – Халыкара гаилә көне билгеләп үтелде. ГАИЛЭ - ул дөньяда яшәүче парларга бердәнбер, кабатланмый торган ышанычлы һәм җан тынычлыгы таба торган урын. Гаилә - ул яраткан эшеңнән эшләп арыганнан сон, йөрәгеңә тынычлык, шифа бирә торган бик изге бер урын. Гаилә ул - әти, әни, балалар, баш өстендә бер түбә, бер үк фамилияләр, озын, буыннан - буынга өзелмичә дәвам итүче тирән тамырлы нәсел җебе. Шушы көннәрдә Халыкара гаилә көне уңаеннан Буа драма театрында “Алтын” парлар, күп балалы гаиләләр, “Минем гаиләм – минем байлыгым!”, “Үрнәк гаилә!” номинацияләрендә катнашкан гаиләләр, ана капиталы сертификатын алучы гаиләләр, шулай ук балалары волонтерлар, актив-студентлар булган гаиләләр чакырылды.

Район башлыгы А.К.Айзетуллов барлык гаиләләрне дә бәйрәм белән котлады: “Гаиләләрегезгә иминлек, татулык, ныклы сәламәтлек. Гаиләгездә җылылык һәм ярату хөкем сөрсен, балалар куанычын, игелеген күреп яшәргә язсын, балаларыгызга якты киләчәк насыйп булсын! Бәйрэм белән, хөрмәтле райондашлар!”