Истәлекле көн
Татарстан Республикасы Министрлар Кабинетының ЗАГС идарәсе Казан институты-Бөтенроссия дәүләт юстиция университеты филиалы белән берлектә яшь казанлыларга тантаналы шартларда паспортлар тапшырды.
Ватанны саклаучылар көне алдыннан тантаналы чара «Казан» гаилә үзәгендә узды. Тантана Россия һәм Татарстан гимннарын тыңлау белән башланды.
Залда җыелган укучыларны һәм ата-аналарны Татарстан Республикасы Министрлар Кабинетының ЗАГС идарәсе башлыгы Эльвира Әхмәтова сәламләде.
«Бүген сезнең өчен үзенчәлекле, истәлекле көн. Сез тантаналы шартларда үзегезнең иң төп документыгызны — Россия Федерациясе гражданины паспортын алачаксыз.
Һәм бу яңа тормыш башы, сезнең җитлеккәнлек, җаваплылык символы. Үзегезнең россиялеләр булуыгыз белән горурланыгыз, Конституциягә тугрылык саклагыз һәм үз эшләрегез белән Ватаныбызның данлы традицияләрен арттырырга лаеклы буын булуыгызны исбатлагыз», — диде Әхмәтова һәм укучыларга әһәмиятле документны горурланып кабул итүләрен, укытучылар һәм ата-аналар горурланырлык изге эшләр башкаруларын теләде.
«Бүген паспорт белән бергә сез Россия Федерациясе Конституциясен – илебезнең төп документын алачаксыз. Аны өйрәнегез, үз хокукларыгызны, бурычларыгызны, җаваплылыгыгызны белегез һәм илебезнең лаеклы гражданнары булыгыз. Халыкларыбызның данлы традицияләрен саклагыз», - диде Әхмәтова.
Бу документ сезгә билгеле бер хокуклар да, бурычлар да бирә", - дип хәбәр итте яшьләргә Казанның ЗАГС идарәсе башлыгы Елена Студеникина.
Казанның 125 нче гимназиясеннән җиденче сыйныф укучысы Дарина Гыйльфанова паспорт алуның үзе өчен мөһим вакыйга булуын хәбәр итте.
«Илгә ярдәм итәргә, волонтерлык акцияләрендә катнашырга мөмкинлек барлыкка киләчәк», - дип сөйләде Диана.
Дарина киләчәктә медик булырга тели. Ә әлегә ул әнисе һәм әбисе белән СВО катнашучылары өчен гуманитар ярдәм җыюларда катнаша. Алгы сызыкта безнең яклаучыларга мораль ярдәм итү өчен гаилә белән уенчык чебурашкалар бәйлиләр.
2025 елда Татарстан ЗАГСлары тантаналы шартларда 3 меңнән артык яшь гражданга паспорт тапшырды.