Йөрәк хәтерли
Ватаннан читтә хәрби бурычларын үтәгән сугышчы-интернационалистларны искә алу көне. Бу көн - батырлык, ныклык һәм Ватанга тугрылык символы. Әфганстанда сынауларны намус белән үткән сугышчы-интернационалистларны хөрмәтләгәндә, без аларның батырлыгын искә алабыз. Кама Тамагы районы үзәк китапханәсендә Ветераннарны һәм Әфганстандагы сугыш хәрәкәтләрендә катнашучыларны чакырып, «Йөрәк хәтерли, беркайчан да онытмаячак», дигән батырлык дәресе үткәрелде.
Вакытның үз хәтере бар - тарих. Шуңа күрә дөнья төрле чорларда планетаны тетрәткән фаҗигаләрне, шул исәптән кешеләрнең гомерен өзгән, цивилизацияләрне артка ташлаган, кешелек тудырган бөек кыйммәтләрне җимергән рәхимсез сугышларны да онытмый, мондый сүзләр белән ЗАГС бүлеге башлыгы Елена Халикова чыгыш ясады.
Сугышчы-интернационалистлар яшь буынга үзләренең тарихлары, белемнәре белән уртаклаштылар. Балалар кызыксынып һәм зур игътибар белән тыңладылар.