Яр Чаллыда гаилә бәйрәме
Кояшлы июль "Гаилә атнасы" белән дә истә калачак. Нәкъ менә шушы җылы, кояшлы айда без Гаилә, мәхәббәт һәм тугрылык көнен билгеләп үтәбез. Ә быел искиткеч чаралар республиканың барлык шәһәрләрендә һәм районнарында атна буена дәвам итте.
Гаилә, мәхәббәт һәм тугрылык көнендә-бөтен ил буйлап гаиләләрне хөрмәтләделәр, алар озак еллар никахлары белән генә түгел, ә балалар тәрбияләүдәге уңышлары, иҗтимагый эшчәнлекләре белән дә аерылып торалар.
Яр Чаллы шәһәренең Орган залында матур шәһәр бәйрәме узды. Чара кунакларын озын буйлы курчаклар, фәрештә образындагы сөйкемле кызлар һәм яшь егетләр, Петр һәм Феврония сәламләде, холлда тере музыка уйнады, мастер-класслар үткәрелде.
Шәһәр мэры Наил Мәһдиев һәм Татарстан Республикасы Дәүләт Советы депутаты, Татарстан Республикасы Дәүләт Советының Социаль сәясәт комитеты рәисе Светлана Захарова Яр Чаллы шәһәренең атаклы гаиләләренә «Мәхәббәт һәм тугрылык өчен» медален тапшырдылар.
Шәһәрнең танылган артистлары һәм иҗат коллективлары бәйрәмнең искиткеч өлешенә әверелде.