Чистай муниципаль районы башлыгы Дмитрий Иванов бриллиант юбилярларны котлады
Чистайлылар Дамир Хаҗиәхмәт улы һәм Равилә Закировна Мортазиннар - 60 ел бергә кулга-кул тотынышып баралар. «Бриллиант» юбилярларны котларга Чистай муниципаль районы башлыгы Дмитрий Иванов килде. Ул юбилярларга чын күңелдән нык сәламәтлек, бәхет, якыннарының мәхәббәте һәм кайгыртуы теләде.
Ә Мортазиннарның мәхәббәт тарихы ерак һәм эссе Казахстанга барып тоташа. Дамир Хаҗиәхмәт улы үзе тумышы белән Чистай районының Уракча авылыннан, сугыш баласы... Һәр йортка, һәр гаиләгә бәла-каза булып килгән сугыш башланганда аңа нибары берничә ай гына була. Джамбул өлкәсенең ОТАР станциясендә Совет Армиясе сафларында 4 ел хезмәт иткәннән соң, яшь Дамир Алма-Ата шәһәрендә калырга карар кыла, анда ул уртак дуслары янында яшь, сөйкемле Равилә белән таныша. Яшь кыз өчен бу чыннан да беренче күрүдә мәхәббәт була. Һәм сез хәзер бер генә минутка шәрык илендәге татар гаиләсен күз алдына китерегез, анда туйга әзерлек бара. Ул вакытта Равиләнең ярәшкән кияве була бит, өстәвенә кияү аның абыйларының якын дусты. Һәм менә Равилә әнисенә туй булмаячак дип әйтә! Мөгаен, өлкән абыйларның реакциясен күз алдына китерергә мөмкиндер. Шуңа күрә дә Дамир Хаҗиәхмәт улын кәләшнең туганнары белән танышкан көнне ишегалдында бәйләмсез йөгереп йөрүче зур бер эт каршы ала. Туй алдыннан яңа кияү хатынын беркайчан да туган ягына Татарстанга алып китмәячәген әйтеп сүз бирә. Һәм ул аны үти. Татарстанга күченү инициаторы 90 нчы елларда Равилә Закировна була.
Бергә яшәүнең беренче елларында балалары булуга карамастан Мортазиннар белем ала: гаилә башлыгы автомобиль техникумын, төзелеш институтының 3 курсын тәмамлаган, Равилә Закировна җиңел сәнәгать техникумы дипломына ия булып, Бөтенсоюз җиңел сәнәгать институтын тәмамлаган. Мортазиннар улы Рамил белән кызы Альмираны тәрбияләп үстерәләр. Оныклары Равил, оныклары Дилия, Дамира һәм Замира бар.
Чистайга күченгәннән соң үз эшләрен ачтылар, эшмәкәрлек эшчәнлеге алып бардылар, хәйрия эшләрендә актив катнашалар. «Сез берәр нәрсә өчен үкенәсезме?" дигән сорауга Дамир Хаҗиәхмәт улы беренче баласы туганнан соң хатынын һәм улын бала тудыру йортыннан каршы ала алмавын искә төшерә. Аны командировкага җибәрделәр. Җаваплы, яшь белгеч баш тарта алмый. Ә хатыны еш кына аңа бу турыда искә төшерә. «Мин бит үземнең чибәр иремне көттем, ә безне иремнең коллегасы - ямьсез казах каршы алды!" ди Равилә апа елмаеп.