Чистайда Гаилә елына йомгак ясау тантанасы узды
Чистайда Гаилә елы ябылуга багышланган "Нык гаилә-көчле Россия!" чарасы узды. Чара мәхәббәт һәм аңлау хөкем сөргән, ә балалар бәхетле үскән гаиләләрне бүләкләүдән башланды. Бер - бер артлы сәхнәгә Алексеевлар, Барановлар, Хәбетдиновлар, Галиевлар, Артемьевлар кебек күп балалы гаиләләр күтәрелде.
"Гаилә тулы булырга тиеш, димәк, өчтән артык бала булырга тиеш. Без районыбызда андый гаиләләрне торган саен күбрәк күрергә телибез, чөнки алар-безнең киләчәгебез", - диде Дмитрий Алексеевич һәм күп балалылыкны чын батырлык дип атап, ата-аналарның балаларны тәрбияләүдәге ролен ассызыклады. Ул шулай ук билгеләп үткәнчә, Чистай районы җан башына исәпләнгән күп балалы гаиләләр саны буенча республика буенча өченче урында тора. Район башлыгы мәдәният, яшьләр һәм ЗАГС бүлекләренә Гаилә елына багышланган төрле чаралар оештырганнары өчен рәхмәт белдерде. Ел дәвамында шәһәрдә һәм районда бик күп чаралар уздырылды, алар арасында бөтен гаилә өчен иҗади очрашулар, фестивальләр, конкурслар һәм киң күләмле гаилә ял көннәре. Тантана тәмамлангач, Дмитрий Алексеевич күп балалы гаиләләрне рәхмәт хатлары һәм истәлекле бүләкләр белән бүләкләде.
Чараның тантаналы өлешеннән һәм гаиләләрне бүләкләүдән соң бәйрәм концерты булды. Сәхнәдә шәһәрнең иҗат коллективлары чыгыш ясады, тамашачыларга матур музыкаль номерлар һәм бию чыгышлары бүләк итте. Һәр номер бәйрәм һәм гаилә уңайлылыгы атмосферасы белән сугарылган иде, җыелган кешеләрдә елмаю һәм алкышлар уятты. Гаилә елы шатлык, җылылык һәм бердәмлек чоры булды. Буыннан-буынга күчә торган гаилә традицияләре йөрәкләребезне һәм өйләребезне үзенә бертөрле яктылык белән тутыра. Бу яктылык беркайчан да сүнмәсен, ә гаилә кыйммәтләре тормышыбызның нигезе булып калсын. Якынлашып килүче 2025 ел илебездә Ватанны саклаучылар елы дип игълан ителде, аңа Чистай районында видеоэлемтә аша Бөек Ватан сугышы ветераны Нәкыйп Хәйруллин старт бирде.